المانيفولد اللعين تشخيص عطلة وصيانتة

لو كنت بتشتكى من #ضعف_عزم_المحرك او ظاهرة الصفع أو الكركرة وعندك ارتفاع (غير مبرر) فى استهلاك البنزين وعملت كل حاجة والمشكلة مابتتحلش

يبقى هات كوباية الشاى الجميلة بتاعتك وتعالى اعرف شوية معلومات النهاردة عن (المانيفولد) Intake Manifold

بالعربى هو مشعب الهواء

شكله:

زى مانت شايف فى الصورة كدة مش هاعرف اوصفه

المانيفولد فيه منه طرازين

- مانيفولد ألومنيوم

- ومانيفولد فايبر

المانيفولد الفايبر أفضل من الألومنيوم وده يرجع لأن الفايبر مش بيسخن الهواء اللى جواه زى المانيفولد الألومنيوم، وعلميا الهواء البارد حريقة والطاقة الناتجة عنه أفضل من الساخن، ولذلك إتجه إليه صانعي السيارات حديثا.

وظيفته:

بيغذى المحرك بالهواء اللازم لكى يتم تشبيعه بالوقود ويتحرق عن طريق شمعات الإحتراق (البوجيهات) وبكدة تنتج الطاقة الحركية وتبدأ السيارة فى التحرك

مكانه:

فوق وش السليندر مباشرة سواء من الأمام أو خلف المحرك

وعشان يقدر يقوم بوظيفته ويغذى المحرك بالهواء بيحتاج إنه يركب عليه حاجات كتير منها؛

البوابة:

ودى اللى بتدخل الهواء للمانيفولد وفقا لحركة بدال البنزين

هاتقولى ياهندسة انت هاتشتغلنى مال بدال البنزين اللى بندوس عليه بالهواء

هاقولك ياحبيب الهندسة إنت بتدوس عشان تزود الهواء اللى داخل للموتور مش بتدخل بنزين خاااالص، وده ظن خاطىء ومنتشر بين الناس

طيب بيبقى راكب على المانيفولد إيه تانى؟

عندك بقى حساس الماب:

والحساس ده بقى وظيفته يقيس الضغط السالب اللى جوة المانيفولد.

طبعا انت مش فاهم يعنى ايه ضغط سالب

بص يانجم، ببساطة كدة البساتم وهى بتتحرك بتشفط الهواء اللى جوة المانيفولد، وكل الضغط السالب ده مايزيد معناه ان البوابة مقفولة فيبدأ الحساس يدى إشارة للكومبيوتر ان العربية شكلها بتقف يامعلمى قلل ضخ البنزين

والعكس صحيح.....

بمعنى ان لو سيادتك دايس على دواسة البنزين (اللى هى مش بنزين) البوابة بتفتح فيدخل هواء كتير فحساس الماب ياخد باله فيقوم يدى اشارة عشان يتم تزويد البنزين عن طريق الكومبيوتر.

وبكدة حساس الماب بيساعد فى الوصول لخليط من الهواء والبنزين مثالى عشان يتم حرقهم جوة الموتور.

علاقة المانيفولد بالفرامل:

المانيفولد بيساعدك فى الفرملة تخيل؟

اه وربنا

قوة الشفط اللى جوة المانيفولد جزء منها بيروح للسيرفو فيساعد مع فى ضغطة الفرامل.

المانيفولد بيركب عليه خرطوم فائض الزيت (خرطوم الفايظ بالمصرى)

الموتور من كتر سخونيته فى زيت بيتبخر فيدخل عن طريق الخرطوم ده للمانيفولد عشان يدخلها مع شحنة الهواء الجديدة وتتحرق معاه، وبكدة يحافظ على البيئة

المانيفولد ومنظومة الEVAP

منظومة ال EVAP غرضها انها تاخد أبخرة البنزين الزائدة جوة التانك عشان مايفرقعش، وتنقلها للمانيفولد عشان تتحرق برضه مع الشحنة، فبرضه نحافظ على البيئة

المانيفولد ومنظومة EGR

ودى منظومة بيتم دمجها مع المانيفولد عشان يتم فيها دمج جزء من العادم ليتم حرقه مع شحنة الهواء فى المانيفولد ولثالث مرة عشان نحافظ على البيئة

طولت عليك أنا عارف بس الموضوع مهم

اشربلك كوباية مياه وتعالى للجزء المهم اللى تحت بقى

الثلاجة أو المانيفولد جزء مهم جدا وللأسف من الأجزاء اللى كثير من قائدى السيارات بيهملها

بيدخله هواء وابخرة بنزين وأبخرة زيت وتراب

محصلة كل ده بعد فترة من الإستعمال إنه بيطين من جوة

بيطين بجد مش هزار يعنى

ينتج بقى من الطين ده لخبطة فى اداء المحرك فتعمل ضعف فى السحب او حدوث ظاهرة الصفع أو الكركرة او زيادة غير مبررة فى إستهلاك البنزين.

وعشان كدة بننصحك كل فترة تفك الحزين ده وتعمله عمليه

نظافة عشان تحسن من أداؤه كدة ويشم نفسه